Еврокомесарот за добрососедска политика и за проширување, Јоханес Хан, утрово има итна средба со посредниците од Договорот од Пржино, европратениците Ричард Ховит, Иво Вајгл и Едвард Кукан, по вчерашната одлука на претседателот Ѓорге Иванов да ги прекине судските процеси против политичките лидери.
Информацијата за средбата ја соопшти Ховит, кој на „Твитер“, покрај фотографијата од средбата, напиша дека наскоро ќе следува и соопштение од средбата.
Urgent meeting with @JHahnEU and MEP mediators in fYR #Macedonia crisis Statement to follow #Македонија #Makedonija pic.twitter.com/Bovv5aI7yw
— Richard Howitt (@richardhowitt) April 13, 2016
По него, на Твитер се огласи и еврокомесарот Хан, кој исто така сподели фотографија од средбата и напиша дека раговараат за политичката ситуација во Македонија.
Discussing current political situation in #Skopje with MEPs @ivajgl, @richardhowitt, @EduardKukan in #Strasbourg. pic.twitter.com/PciLrA3SVs
— Johannes Hahn (@JHahnEU) April 13, 2016
Хан и Ховит вчера ја осудија одлуката на Иванов, велејќи дека тоа предизвикува сериозна загриженост за владеењето на правото во земјава.
Европратеникот Ховит предупреди на многу сериозни последици доколку некоја од партиите или поединец е одговорен за прекршување на Договорот од Пржино, додека Хан рече дека по последните случувања, има сериозен сомнеж дали веродостојни избори сè уште се можни.
Иванов во обраќањето до нацијата објасни дека одлуката ја донел сам и оти таа има цел да стави крај на политичката криза, која не успеала да се реши со Договорот од Пржино.
