Само еден отсто од општата популација во Македонија знае што означува ЛГБТИ, високи 58 отсто од родителите сметаат дека ако нивното дете е ЛГБТИ, треба да се лекува, а 84 отсто од граѓаните во државата не поддржуваат парада на гордоста, покажуваат резултатите од регионалното истражување на јавното мислење за ЛГБТИ, кое летово се спроведуваше во Македонија и во другите земји од Западен Балкан.
Од „Субверзивен фронт“ и „ЛГБТ Јунајтед“ – Тетово велат дека резултатите од истражувањето се загрижувачки, особено поради ставовите и перцепциите на населението за оваа ранлива и дискриминирана група граѓани.
– Иако за голем дел од резултатите на ова сеопфатно истражување на јавното мислење за ЛГБТИ во Македонија имавме изградено прилично точни претпоставки и очекувања, сепак, навистина е загрижувачки да се прочита дека мнозинството од луѓето овде сметаат дека си болен и дека треба да се лечиш. Трендот на иселување на ЛГБТИ-лицата од земјава и понатаму е нагорен, а насилството врз ЛГБТИ-лицата како горлив проблем еднакво се препознава и од општата јавност и од самите ЛГБТИ-лица. Клучниот заклучок од овие сознанија е дека ЛГБТИ-лицата во голем дел идентификуваат дискриминација во сферите на вработување, полициска заштита и социјална заштита – области каде државните органи имаат надлежност и обврска да постапуваат и да дејствуваат – вели Антонио Михајлов од „Субверзивен фронт“, здружение што ги застапува правата на ЛГБТИ-лицата.
Беким Асани од „ЛГБТ Јунајтед“ – Тетово вели дека истражувањето, исто така, покажало дека се зголемува бројот на припадниците на ЛГБТИ-заедницата што сакаат да станат активисти во борбата за нивните права.
– Она што нам, како активисти, нè охрабрува и ни помага во креирањето на визијата за иднина, е податокот дека третина од ЛГБТИ-лицата во Македонија кои одговориле на прашалникот, сакаат да станат активисти за ЛГБТИ-права, дека личниот контакт со ЛГБТИ-лице значително ги редуцира стереотипите и предрасудите кон оваа заедница и дека физичкото насилство врз овие лица е неприфатливо – изјави Беким Асани од „ЛГБТ Јунајтед“ – Тетово, организација која работи на зајакнување на ЛГБТИ-заедницата во Македонија.
Истражувањето го спроведуваше регионалната програма на Националниот демократски институт од Вашингтон во соработка со канцелариите на „Ипсос стратеџик маркетинг“ во Албанија, Босна и Херцеговина, Косово, Македонија, Србија и во Црна Гора, во јуни и во јули годинава.