Истражната постапка на Јавното обвинителство за трагедијата во Кочани, во која животите ги загубија 59 лица, а стотици беа повредени, е во тек, но засега не смее да се откриваат детали, соопштија денеска оттаму.
„Јавните обвинители од тимот кој ја води предистражната постапка, континуирано преземаат повеќе истражни дејствија за обезбедување докази. И денеска се во тек такви дејствија кои вклучуваат распити, анализи и вештачења од голем обем и во однос на различни институции. Но, за да се зачува тајност на постапката и да се спречи компромитирање на доказите, Обвинителството не е во можност во моментов да открива повеќе детали за активностите“, соопштија оттаму.
Трагедијата се случи рано утрото на 16 март, во дискотеката „Пулс“ во Кочани, на настап на членовите на групата ДНК, откако избувна пожар, од задушување животите ги загубија 59 лица, најмногу млади, а стотици беа повредени. Најтешко повредените беа испраќани на лекување и третман во земјите во регионот, како и во европски здравствени центри.
Државниот јавен обвинител, Љупчо Коцевски, неколку дена по катастрофата, соопшти дека осомничени се вкупно 34 лица, вклучувајќи го сопственикот и управителот на дискотеката „Пулс“, обезбедувањето, поранешен министер, државен секретар, раководители на сектор и одделение, помлад соработник, поранешни градоначалници, директори на пазарен инспекторат, инспектори, градоначалници, продавачи на билети, неколку компании од Кичево и од Скопје, полициски службеници. Тој кажа дека сите тие знаеле дека дискотеката не ги исполнува условите, но придонеле кон тоа таа да работи и да организира концерти и забави.
