Основното јавно обвинителство за гонење на организиран криминал и корупција ја прошири истрагата против четири нови лица за предметот за нелегален увоз, дистрибуција и апликација на медицински лекови и медицински помагала. Од таму информираат дека биле реализирани претреси на пет локации во Скопје, меѓу нив и на две здравствени установи при што се приведени три лица, од кои двајца доктори.
Врз основа на прибраниот доказен материјал, е почната истражна постапка против четири лица. Тројца осомничени се товарат за кривичните дела „злосторничко здружување“ и „повреда на права од индустриска сопственост и неовластена употреба на туѓа фирма“, додека едно лице е осомничено за кривичното дело „повреда на права од индустриска сопственост и неовластена употреба на туѓа фирма“.
По предлог на надлежниот јавен обвинител, на сите четворица осомничени судијата на претходна постапка при Основниот кривичен суд Скопје им определи мерки на претпазливост.
Предметот е оформен во април годинава кога почна истражна постапка против 17 физички и шест правни лица за кои постои основано сомневање дека се инволвирани во извршување на кривичните дела „злосторничко здружување“, „повреда на права од индустриска сопственост и неовластена употреба на туѓа фирма“ и „примање поткуп“. Од ОЈО велат дека истрагата ќе продолжи во насока на целосно расчистување на сите околности на случајот и утврдување на евентуална инволвираност и на други лица.
