Грчкиот премиер Алексис Ципрас денеска има средба со судбината во Брисел. „Ден Д“ за Грција, договор или нова финансиска неизвесност и можен банкрот е дилемата со која Ципрас ќе се соочи вечерва на вонредниот самит на Европската унија.
Грчкиот премиер е веќе во белгиската престолнина, со доставени нови предлози и реформи до европските кредитори, кои ќе чекаат на нивно одобрување или одбивање до крајот на денот.
Идејата на грчката влада е денеска, конечно, да се завршат преговорите и Ципрас да се врати во Атина со зелено светло од ЕУ и со договор за нов финансиски пакет, кој ќе ја осигури финансиската стабилност на државата, но се очекува сѐ да биде неизвесно до самото завршување на вечерашната средба на лидерите на ЕУ.
Првите реакции на дел од европските лидери за новата листа грчки реформи се позитивни, но останува под знак прашалник како ќе се надминат недоразбирањата и несогласувањата околу грчките и европските црвени линии и дали ќе се најде начин да се постигне компромис без Грција да се соочи со можноста за банкрот и за напуштање на еврозоната.
Викендов Грција на барање на кредиторите достави нова подобрена листа на реформи, во кои има идеи за воведување вонредни даноци за компаниите и за индивидуалците со високи приходи, укинување на предвремените пензионирања, идеи за надминување на дупката од 900 милиони евра која постои во преговорите и кои, според Европската комисија, се добра основа за денешните преговори.
Преговорите ќе бидат на политичко ниво наместо на ниво на министри за финансии на ЕУ, токму онака како што владата на Ципрас и СИРИЗА посакуваа и се надеваа од самиот почеток. Останува да се види дали тоа ќе ѝ биде од корист на грчката страна, по сите овие месеци неуспешни преговори и удирање во ѕид поради непопустливоста од двете страни околу прашањата како зголемување на данокот на додадена вредност, справувањето со платите, пензиите и со бенефициите на семејствата што живеат на раб на сиромаштија, како и со приватизацијата на државни компании.
Ципрас, во суштина, ќе се најде на тест дали е можно да се придржува до европските барања, правила и принципи и да покаже волја за компромис и за во иднина и да ја раководи Грција по европски терк или, пак, планира да продолжи со бунтовничкиот став против ЕУ.
Наспроти тестот на европските партнери, стои и барањето на народот кој последниве денови излезе на неколку протести во знак на поддршка на владата и на нејзиниот став кон ЕУ и кој очекува Ципрас да не дозволи државата да се врати во рецесија и да прифати нови строги мерки за штедење, кои дополнително ќе го стегнат ременот на граѓаните.
Кусо пред почетокот на историскиот самит, кој се очекува да ја одлучи иднината на Грција, Ципрас ќе се сретне со првиот човек на Комисијата, Жан-Клод Јункер, шефицата на ММФ, Кристин Лагард, и со претседателот на Советот на ЕУ, Доналд Туск.
Паралелно со неговите средби, ќе има состанок на европската работна група што детално ги разгледува точките и реформите за Грција, како и состанок на Еврогрупата, на кој ќе учествува министерот за финансии, Јанис Варуфакис.
М.П.
