Постот што го рецензираме е манипулативен и му недостасува контекст. Тоа што на ист ИБАН број – меѓународен број на банкарска сметка, се собираат донации за настраданите во Турција и помош на Украина, не значи дека се прави манипулација со парите. На иста меѓународна банкарска сметка сметка може да се донираат пари за настраданите во Турција и Сирија, со тоа што во „цел на дознака“ треба да се напише дека донацијата е за земјотресот во Турција и Сирија, но и парична помош за луѓето во Украина, ама тоа треба да се наведе во „цел на дознака“, пишува „Вистиномер“ во својата анализа.
Текстот подолу го пренесуваме во целост:
На социјалните мрежи e споделена објава којашто тврди дека на ист ИБАН број се уплаќаат средства за помош на Турција и на Украина. Ова е манипулација и недостаток на контекст бидејќи може ист ИБАН број да се користи за повеќе намени, што не е значи дека се прави злоупотреба на средствата.
VNIMANIE: IBAN SMETKOVNIOT BROJ ZA POMOS NA TURCIJA E IST KAKO I- BAN BROJOT NA UKRAINA
По разорниот земјотрес којшто се случи минатата недела во Турција и силно ја погоди неа и соседна Сирија при што илјадници лица ги загубија животите, а уште повеќе останаа без своите домови, низ светот започнаа да се собираат донации за да им се помогне на двете земји.
Во објавата којашто е предмет на оваа рецензија, се тврди дека ист е ИБАН бројот за донации што се собираат за настраданите во Турција како и за помош на Украина. Ова е вистина, но тоа не значи дека се прави манипулација со парите како што се инсинуира во објавата во којашто со големи буки на почетокот е напишан зборот ВНИМАНИЕ.
Што е ИБАН?
ИБАН– кодот е Меѓународен број на банкарска сметка, уникатен сет на знаци составен од најмногу 34 букви и бројки што им помага на банките да ги обработуваат трансферите ширум светот. Банките и другите институции користат IBAN за да идентификуваат поединечни сметки. Тие ги комбинираат вашите локални банкарски податоци во една низа знаци, што го олеснува идентификувањето на вашата сметка при испраќање или примање пари.
Ако испраќате или примате пари на меѓународно ниво, повеќето европски банки ќе побараат број на меѓународна банкарска сметка ИБАН. ИБАН е најбезбедниот, најефикасен начин да се уверите дека вашите пари ќе стигнат таму каде што треба.
Авторот на оваа објава, во која што се тврди дека е ист ИБАН бројот за различни донации, во коментар на објавата споделил фотографија од ИБАН бројот на која се гледа дека тој се користел и за донации за Турција но и за донации за Украина.
За што точно станува збор?
Овој ИБАН број DE53 200 400 600 200 400 600, е ИБАН број од Германија, не од Македонија. Тоа значи дека ова се донации коишто се собираат во Германија и немаат никаква врска со донациите коишто во Македонија се собираат за настраданите во Турција. Ова не е наведено во објавата, па затоа корисниците на социјалните мрежи може да помислат дека наводната манипулација е за македонските донации.
Овој германски ИБАН број е на 23 германски хуманитарни организации, „Bündnis Entwicklung Hilft“ и „Aktion Deutschland Hilft“ кои повикуваат на донации за помош на луѓе за да се справат со разни катастрофи. Станува збор за реномирани германски хуманитарни организации кои нудат хуманитарна помош во странство во случај на големи катастрофи и вонредни ситуации. Сите хуманитарни организации обединети во сојузите се граѓански организации кои работат независно од владите и имаат строги механизми за внатрешна контрола за спречување на корупцијата и се проверуваат од надворешни независни ревизори.
На нивната сметка може да се донираат пари и за настраданите во Турција и Сирија со тоа што во цел на дознака треба да се напише дека донацијата е за земјотресот во Турција и Сирија.
На истата сметка може да се донираат пари и за помош на оние коишто се справуваат со катастрофите од војната во Украина, но тоа треба да се наведе во цел на дознаката.
Впрочем, исто како и со секоја, каква било банкарска сметка, без разлика дали се работи за правно или физичко лице. Никој не отвара посебни банкарски сметки за секој прилив на пари. Затоа, помеѓу другите податоци, постои и категорија „цел на дознака“ за да се знае точно за што се парите коишто се уплаќаат.
Имајќи ја предид горенаведената аргументација сметаме дека постот што го рецензираме е манипулативен и му недостасува контекст.
***
Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
