Милитантната група Исламска држава, која се бори во Ирак и во Сирија, го обезглави американскиот хуманитарен работник Питер Касиг.
Касиг е убиен, иако, откако минатата година беше киднапиран во Сирија, премина во ислам, јавува „Би-Би-Си“.
ИСИС во октомври објави видеоснимка на која се гледа убиството на британскиот хуманитарен работник Ален Хенинг, а исламистите се заканија дека ќе го обезглават и Касиг.
Дваесет и шестгодишниот Касиг е поранешен воен ренџер, кој во Турција ја основаше хуманитарната организација СЕРА, за да им помага на бегалците од Сирија и да го снабдува бегалските кампови со храна и со медицинска опрема.
Исламската држава на снимката прикажа и обезглавување на најмалку 15 мажи, за кои тврди дека се припадници на сириската војска.
