Иранската револуционерна гарда за време на воените вежби лансирала неколку балистички ракети, јави новинската агенција ИРНА.
Ракетите се лансирани во текот на ноќта од неколку позиции во земјата, а на видеоснимката што ја објави државната агенција се гледаат ракети во подземни силоси, а потоа блесоци светлина.
Ракетите демонстрираат моќ со тенденција за заплашување и за покажување подготвеност на Иран да се спротивстави на заканите, наведува ИРНА.
Во извештајот не се прецизира колкав е дометот на ракетите ниту, пак, се откриваат повеќе детали.
Иран во октомври лансираше нов тип балистичка ракета земја-земја до долг домет, што беше прва проба по историскиот договор за нуклеарната програма на Техеран со шесте светски сили, постигнат минатото лето.
