Специјалните сили на ирачката војска денеска ја истражиле мрежата од подземни тунели источно од градот Мосул и пронашле импровизиран објект што милитантите на Исламска држава (ИД) го користеле за правење бомби, јавуваат светските агенции.
Импровизираната фабрика за бомби била пронајдена во село во близината на Мосул, кое е ослободено во рамките на офанзивата на ирачките сили и на нивните сојузници против милитантите на ИД.
Ирачките специјални сили, исто така, пронашле и тунел, опремен со светла и со вентилација, кој водел од локалната џамија до главниот пат.
Во досегашните операции за ослободување на Мосул, кој е последното упориште на ИД во Ирак, биле откриени голем број подземни тунели, кои, како што се смета, милитатните на екстремистичката организација ги користеле како засолништа од воздушните напади на меѓународната коалиција предводена од САД.
