Полицијата во Индија го уапси директорот на фабриката за лекови и неговите синови под обвинение дека ги снабдувале со лекови жените што подлегнале на масовна стерилизација, од кои 13 починаа. Приведените се товарат за измама.
Властите сè уште го истражуваат случајот и утврдуваат дали антибиотиците и лековите против болки се одговорни за трагичниот крај на жените.
Полицијата претходно го уапси лекарот кој ја изврши масовната стерилизација во сојузната индиска држава Чатисгар.
Лекарот Р.К. Гупта за неколку часа извршил 83 операции над сиромашни жени во државниот камп во областа Биласпур, а постои сомнеж дека инструментите со кои се вршел зафатот не биле стерилни.
Лекарот ги отфрли обвиненијата и додаде дека стерилизацијата ја вршел под притисок на државата. Тој ја лоцираше вината кај лековите кои жените ги земале по интервенцијата.
Стерилизацијата е еден од најпопуларните методи за планирање семејство во Индија, а многу власти во индиските држави организираат кампови во кои се врши бесплатно масовно стерилизирање на сиромашните жени.
Локалните власти во Индија често нудат разни погодности, како што се автомобили, електрични уреди за двојките кои доброволно ќе подлегнат на стерилизација.
