Собранието на денешната седница ги именуваше Мики Милковски и Мирјана Кацарска за заменици на генералниот секретар на законодавниот дом. Двајцата се дипломирани правници, а Кацарска е со положени правосуден, нотарски и испит за извршители.
По ова Собранието ја почна 22. седница, на која ги прифати предлозите на Владата по скратена постапка да бидат усвоени измените на законите за Судскиот совет, за Советот за утврдување на факти, за заштита на сведоци, за измените на Законот за пензиското и инвалидското осигурување, за здравственото осигурување, за Законот за придонеси од задолжително социјално осигурување и за измените на Законот за акцизите. Откако мнозинството пратеници ги усвоија предлозите измените на законите да одат по скратена постапка, претседателот на Собранието, Талат Џафери, ги достави на разгледување до надлежените комисии.
На оваа седница Собранието треба да гласа и за именувањето на новиот државен јавен обвинител, функција за која Владата го предложи Љубомир Јовески, актуелен член на Советот на јавни обвинители.
Според новиот дневен ред што го утврди Џафери за продолжението на 22. седница, именувањето на јавниот обвинител е петта точка по ред.
Пратеникот и координатор на една од десетте пратенички групи на ВМРО-ДПМНЕ, Илија Димовски, на седницата процедурално реагираше на тоа што законите се носат по скратена постапка и побара од колегите од Владата, колегите од мнозинството и од спикерот Џафери да ја променат ваквата практика.
На ова реагираше координаторот на пратеничката група на СДСМ, Томислав Тунтев, кој рече дека дел од предложените закони по скратена постапка, веќе биле пред Собранието во претходниот состав.
Претседателот на Собранието даде пауза, а пратениците со работотата по 22. седница треба да продолжат по 15 часот.
