Независниот „Wonderland Theatre“ на 11 јуни ќе ја има својата прва онлајн театарска претстава насловена „Илузии“ по мотиви на истоимениот текст на Иван Вирипаев. Претставата ќе може да се проследи на нивниот Youtube канал.
Улогите ги играат Ивана Павлаковиќ, Драгана Лошкова, Никола Насотски и Исмет Шабановиќ. Режијата е на Нела Витошевиќ, видеото го монтира Васил Христов, а за музиката задолжен е Огнен Анастасовски.
Како што вели актерската екипа, причината за ваквиот пристап на создавање театар е глобалната здравствена криза која им оневозможила присуство на театарските сцени.
„Засведочивме период во кој театарот од целиот свет се наоѓа пред ист предизивк, пред иста дилема, со еднаква можност за обмислување и нудење решенија и нови форми“, велат од Wonderland Theatre.
За време на полицискиот час, актерите ја користеле Zoom платформата да разговараат за тоа како и што да работат за време на кризата.
„Користејќи се со театарски пристап во виртуелниот простор, направивме претстава која ги отвара темите на љубов, неверство, оттуѓеноста на луѓето, празнотијата и минливоста на животот. Теми кои во екстремни времиња како ова кое го живееме, несомнено се актуелизираат кај секој човек“ – додаваат тие.
