Милијардерот Илон Маск им подели чекови од 1 милион долари на двајца гласачи од Висконсин, нарекувајќи ги портпароли на неговата политичка група, во пресрет на изборот на судија за Врховниот суд на оваа држава, објави британски Гардијан. Маск изјави дека овој избор е критичен за агендата на Доналд Трамп и „иднината на цивилизацијата“.
„Ова е многу значајно“, изјави Маск пред околу 2.000 луѓе во Грин Беј во неделата навечер, носејќи жолта капа во облик на парче сирење.
Маск и групите што ги поддржува веќе потрошиле над 20 милиони долари за да му помогнат на конзервативниот кандидат Бред Шимел во изборот што ќе ја одреди идеолошката структура на судот, кој веројатно ќе донесува одлуки за клучни прашања во оваа политички важна држава. Маск стана централен лик во изборната битка, при што либералната кандидатка Сузан Крофорд и нејзините поддржувачи протестираат против неговото влијание врз судот.
„Мислам дека ова е важно за иднината на цивилизацијата. Толку е значајно“, рече Маск.
Тој нагласи дека Врховниот суд на Висконсин може да се занимава со прекројување на изборните единици, што би можело да влијае врз контрола на Конгресот во САД.
„Ако Врховниот суд на Висконсин ги редефинира изборните единици, тие ќе ја манипулираат картата и ќе ги лишат републиканците од две места во Конгресот. Потоа ќе се обидат да ги блокираат сите реформи што ги спроведуваме за вас, народот на Америка“, предупреди Маск.
Во неделата, Врховниот суд на Висконсин едногласно одби да ја разгледа итната жалба на државниот јавен обвинител, демократот Џош Каул, кој тврдеше дека акцијата на Маск е незаконска.
„Законите на Висконсин забрануваат давање нешто од вредност за да се поттикне некој да гласа. А Илон Маск токму тоа го направи“, тврди Каул.
Адвокатите на Маск возвратија дека тој само ги користел своите права на слобода на говор, и дека какво било ограничување на неговите активности би било спротивно на уставите на Висконсин и на САД.
„Овие плаќања имаат за цел да генерираат народно движење против активистичките судии, а не да повикуваат на поддршка или противење на одреден кандидат“, аргументираа адвокатите на Маск во поднесоците до судот.
Маск веќе користеше слични тактики во претседателските избори минатата година, кога понуди по 1 милион долари дневно на гласачи во Висконсин и шест други клучни држави за да потпишат петиција во поддршка на Првиот и Вториот амандман. Судот во Пенсилванија тогаш утврди дека нема докази дека акцијата претставува незаконска лотарија и дозволи да продолжи до денот на изборите.
Адвокатите на Маск, само неколку часа пред почетокот на собирот во Грин Беј, побараа од двајца либерални судии во Врховниот суд на Висконсин – Џил Карофски и Ребека Далет – да се изземат од случајот, тврдејќи дека нивната поддршка за Крофорд создава сомнеж за пристрасност. Обете судијки го одбија барањето и најавија дека подоцна ќе ги објаснат своите причини.
Конзервативниот кандидат Шимел, кој носеше капа со натписот “Make America Great Again” за време на неговата кампања, изјави дека не може да контролира „никакви надворешни средства, било да доаѓаат од Илон Маск или од некој друг“.
Изборната кампања во Висконсин руши рекорди по потрошени средства во судски избори, надминувајќи 81 милион долари. Врховниот суд на државата се очекува да носи одлуки за прашања како што се правата на абортус, прекројување на изборните единици, правата на синдикатите и изборните правила што би можеле да влијаат на изборите во 2026 и 2028 година.
