Илјадници граѓани се собраа денеска на протест во Тирана кој го организираше лидерот на опозицијата Лулзим Баша. Повеќе граѓани говореа на протестот изразувајќи ги нивните грижи и причини за да протестираат против актуелната власт. Некои од нив имаа говори кои се однесуваа на даночната реформа и ароганцијата на владата, додека Баша повика на техничка влада, затоа што, како што рече, онаа која владее сега не е во можност да одржи слободни и фер избори.
Мајка на две деца, зборуваше за тоа како таа морала да го затвори својот мал бизнис затоа што не можела да си дозволи високите даноци.
Друг демонстрант рече дека дошол да ја сподели со јавноста трагедијата што се случува во медиумите и дека тие се цензурирани од власта која ги контролира.
Според албанските медиуми, илјадници Албанци патувале низ цела Албанија да присуствуваат на денешниот протест организиран од страна на Демократската партија.
Лидерот на опозицијата Баша рече дека во земјата или ќе има фер избори или воопшто нема да има. Тој ја обвини владата дека е целосно коруптивна и дека ќе ги купи следните избори со тоа што ќе дозволи земјата да стане „рај за марихуана“. Тој неколку пати повтори дека владата не е во можност да гарантира слободни избори и дека излезот го гледа во техничка влада.
Премиерот на Албанија, Еди Рама кој се наоѓа во дводневна посета на Приштина направи паралела помеѓу денешниот протест и протестот одржан на 21 јануари 2011 година кога четворица демонстранти беа убиени. Тој ја истакна значајната разлика помеѓу односот на неговата владата кон демонстрантите и односот на Демократската партија кога беше на власт.
Иако на демонстрантите им беа дадени четири саати за протест, тие изградија шатор за да останат да протестираат. Министерот за внатрешни работи, Саимир Тахири рече дека полицијата нема да ги спречи и дека присуството на 2.000 полицајци е за да ги заштити демонстрантите.
