Излегувањето на алтернативното продолжениe за бесплатната игра Warframe наречено „1999” ја буди носталгијата од Сајберпанк филмовите, стриповите, музиката и книгите во осумдесетите и деведесетите години од минатиот век. Ова е трејлерот за апдејтот што е моментално Live во играта:
Основната референца со насловот 1999 е тоа што, покажува дека условно кажано, се ближи крајот на светот со преломот на милениумот, што секако, не се случи. Главна инспирација и за самата игра се книгите на Вилијам Гибсон, за сајберпанк мрачна иднина каде сите имаат оружја од секаков вид, хакирање во виртуелна стварност и уште многу други нешта.
Протагонистот неслучајно се вика Артур, затоа што го вози првиот Екскалибур ворфрејм, секако, референца за Крал Артур. Исто така. Артур е лик во постарата игра Dark Sector, каде што првиот хибрид ворфрејм е полу-машина полу-човек.
Што се однесува до изгледот на протагонистот очигледна е сличноста со ликот од „Бонели стриповите”, Натан Невер (Nathan Never), а потсетува и на Solid Snake од серијалот Metal Gear Solid. Артур е дури и слеп на едното око, исто како Snake. Иако другите ликови се интересно дизајнирани во класична разновидна дружина со диверзитет и здружени сили против тотална глобална термонуклеарна војна, сепак ликот на Артур е најдобро сработен, посебно поради тоа што неговата облека е со изглед на Ворфрејмот Екскалибур.
Друга очигледна референца е возењето мотор како во анимето Акира, што е направено според броен серијал манга стрипови со истото име. Секако, има и огромна инспирација и од Ghost in The Shell. Сето ова иако е адаптирано на „Warframe универзумот”. Има и комични елементи што дури вадат од контекст и даваат класичен избор на оружја и додатоци за борба како иконичните протетички раце со метални канџи. И непријателите можат да бидат комбинација од „инфестет” стар модел на телевизор и роботички делови во едно. Иако има „comic relief”, најновото ажурирање на играта има одлична атмосфера што многу потсетува и на играта Hellgate London (која не е активна во моментот, а беше своевремен мултиплејер светски хит) направена од луѓе што работеле на Диабло игрите.
Музиката во самата игра е од хеви-метал жанрот и одлично се вклопува со динамичната, несопирлива и постојана акција во играта.
Апдејтот доаѓа бесплатно, а и самата игра е бесплатна на Steam. Исто така, може и да се игра ако се симне и од веб-страницата на фирмата што ја изработува и надоградува Digital Extremes.
Подолго време известуваме за инвентивните промени во Warframe во написи што можете да ги прочитате овде. Главниот слоган на играта е „Нинџите играат бесплатно”.
