Мобилната игра „Tie Dye“ на македонското студио за игри „Furious Avocado“ пред неколку дена надмина 100 милиони преземања низ целиот свет. Станува збор за „Направи сам“ (DIY – do it yourself) креативна игра со која може да се бои облека според свој избор. Играта е лесно разбирлива и достапна за пошироката публика.
Од „Furious Avocado“ во нивната објава на „Фејсбук“ веќе си ја поставија новата цел, а тоа е играта да достигне 200 милиони преземања во наредниот период. Од тимот велат дека станува збор за неверојатно патување, во кое континуирано се развива оваа игра со многу љубов и грижа уште од нејзиното лансирање минатата година.
Оваа игра лани веќе беше прогласена за најдобра casual игра во Кина, каде што се стекна со првата награда. Огромен успех и интерес беше постигнат и во САД, а „Мета.мк“ минатата година разговараше и со основачите на играта и на гејминг студиото од земјава што постигна огромен успех.