Високи претставници на НАТО и на земји-членки на ЕУ биле прислушувани за време на своите посети во Македонија, изјавил лидерот Зоран Заев за бугарската новинска агенција „Фокус“.
На снимените разговори, кои ги поседува Заев, се наоѓал поранешниот генерален секретар на НАТО, Андерс Фог Расмусен, за време на неговата посета на Скопје, на 22 мај 2014 година, како и бугарскиот премиер Бојко Борисов, кој беше во Македонија на 17 февруари 2013 година, три дена пред неговата влада да поднесе оставка.
Заев за „Фокус“ открива дека снимките претежно содржат приватни разговори на високите претставници.
Агенцијата пишува дека засега не се знае дали разговорите ќе бидат обелоденети на прес-конференција, пред лидерот на СДСМ да им ги предаде на Борисов и на Расмусен.
Заев досега им ги достави снимките од преслушуваните разговори на шест дипломати, меѓу кои, како што наведува „Фокус“, се двајца американски амбасадори, како и високи претставници на бугарската амбасада во Македонија. Претходно, Заев му ги достави снимените разговори и на италијанскиот амбасадор во Македонија.
