Четириесет и пет поранешни пратеници и активисти денес беа осудени на четири до десет години затвор, во најголемиот случај за националната безбедност во Хонгконг, пренесува „Асошиејтед прес“.
Тие беа кривично гонети за нивните улоги на неофицијални прелиминарни избори за претставници во градскиот законодавен дом, кои беа одржани во 2020 година. Изборите беа кулминација на масовните про-демократски протести кои започнаа во Хонгконг во 2019 година, против законот од Пекинг кој ќе овозможел екстрадиција на хонгконшки граѓани во Кина.
Целта на изборите било да се одбере кандидат од про-демократските партии да биде претставник на движењето на официјалните избори за градскиот законодавен дом, за да се избегне поделба на про-демократските гласови.
Како последица на протестите и организираните избори, Кина во 2020 година го усвои Законот за национална безбедност, со кој ефективно се забрануваат секакви протести. Осудените активисти беа обвинети за прекршување на токму овој закон.
Судот во Хонг Конг осуди 45 од 47 обвинети за заговор и за организирање или учество на неофицијални избори за градскиот законодавен дом во 2020 година. Повеќето од обвинетите беа опозициски политичари. Другите обвинети беа бизнисмен, социјален работник и други продемократски активисти.
На неофицијалните прелиминарни избори одржани во јули 2020 година гласаа 610.000 граѓани, а се очекуваше победниците да продолжат на официјалните избори. Властите сепак ги одложија изборите поради пандемијата.
Најдолгата казна од десет години ја доби правниот академик Бени Таи, кој судиите рекоа дека е главниот чинител во конципирањето и организирањето на прелиминарните избори. Тие рекоа дека Таи во суштина сакал да предизвика револуција. Сепак, судиите изјавија дека казните биле скратени за обвинетите кои рекле дека не знаеле дека планот на Таи е незаконски.
„Се осмеливме да го соочиме режимот со прашањето: ‘Дали некогаш ќе биде можна демократијата во таква структура?’ Одговорот беше целосна репресија на сите фронтови во општеството“, напиша на социјални мрежи новинарката и активистка Гвинет Хо, на која ѝ беше пресудена затворска казна од седум години.
