Премиерот на Србија, Александар Вучиќ и заменик помошникот државен секретар за Европа и Евроазија, Брајан Хојт Ји денеска во Белград се согласија дека најважната политичка цел во регионот на Западен Балкан е зајакнување на мирот и стабилноста затоа што без тоа нема ни економски напредок.
Ји изјави дека американската политика спрема Западен Балкан не е значајно променета со изборот на претседателот Доналд Трамп и дека САД ќе продолжат да и помагаат на Србија во европската интеграција, соработката во регионот и дијалогот со Приштина.
Тој додаде дека САД очекуваат регионалните лидери да покажат политичка волја и да продолжат со реформите дури и кога во нивните земји постои замор.
Ји рече дека со Вучиќ разговарал за начинот на кој САД можат да му помогнат на регионот да се движи напред, да стане поуспешен, посигурен, стабилен, интегриран во ЕУ и во евроатланските институции како и во борбата против криминалот, трговијата со наркотици и корупцијата.
Посебно ја истакна важноста од соработка на земјите од регионот, процесот на помирување и нормализација на односите помеѓу Белград и Приштина.
Одговарајќи на прашање за влијанието на Русија на Балканот, американскиот претставник наведе дека САД сакаат да соработуваат со Москва каде што е тоа можно и изрази надеж дека Русија ќе игра конструктивна улога во регионот.
-Но таму каде што американските и руските интереси, цели и вредности не се компатибилни, или се спротивставуваат, САД силно ќе ги бранат и чуваат своите интереси и интересите на нивните сојузници и партнери – додаде Ји.
