Генералниот директор за политички прашања при Министерството за надворешни работи на Албанија, Ферит Хоџа, прашан за наводната интервенција на Тирана во платформата на албанските партии во Македонија, изјавил дека „не постои тиранска платформа“, јавува дописничката на „Мета“ од Тирана.

Тој додал дека средбите со албанските политички лидери од регионите каде што живеат Албанци, било во Македонија, Прешево или Црна Гора, се рутина.

Во однос на македонските политичари, тој рекол дека „секој модел што ги исклучува Албанците и нивните легитимни уставни права, нема да резултира како успешен план во Македонија“.

За влијанието на Русија врз Македонија одговорил дека тоа нема да помогне во решавањето на проблемите овде.