Случувањата со „Телеграм“ и затворената група „Јавна соба“ се проблем за кој алармираме веќе долго време, велат од Асоцијацијата за здравствена едукација и истражување ХЕРА.

Од таму додаваат дека врсничкото и родово базираното насилство се секојдневен проблем со кој се соочуваат младите, во и надвор од училиштата.

„Ако барате виновници, не ги барајте кај младите. Нивните однесувања се резултат, односно последица на лоши ситемски решенија, образовен систем и игнорантноста на „возрасните“ за нивните проблеми. За жал, насилството не започна, ниту пак ќе заврши со постоењето на оваа група. Сведоци сме на секојдневни инциденти и различни форми на насилство кај младите кои им оставаат траги за цел живот и им влијаат на нивниот психофизички развој“, велат од ХЕРА.

Според нив, многу често младите кои се жртви, не можат да го препознаат тоа или пак ако го препознаат немаат каде да  пријават.

„Тоа што го гледаме на терен е дека дури и тогаш кога ќе најдат начин и се охрабрат да пријават, наидуваат на „двојна виктимизација“ како од нивните врсници, така и од нивните родители и професори. Родителите сѐ почесто панично ни се обраќаат и бараат поддршка, затоа што не се спремни да одговорат на проблемите кои се секојдневна реалност на нивните деца,“ додаваат од Асоцијацијата.

Од таму потенцираат дека неретко, и професорите бараат мислење и помош во врска со овие теми затоа што сѐ уште не се обучени и немаат доволно знаење како да постапат во вакви комплексни ситуации.

„Ова е само уште еден знак дека под итно треба задолжително воведување на сеопфатно сексуално образование, чие воведување ужива голема поддршка и од самите родители и кое ќе ги научи младите кои се нивните права и обврски, ќе ги научи отворено да зборуваат за својата сексуалност, ќе бидат поинформирани наспроти тоа да се постојано мета на неточни и штетни информации кои им го поматуваат умот и ги збунуваат уште повеќе. Еманципирана младина е здрава младина, младина со личен интегритет и свесност за себе. А, тогаш кога ќе научат да се ценат себеси, ќе умеат да го ценат и другиот. Еманципирана младина е емпатична младина, образованието е несомнено превенција за ваквите форми на насилство“, се додава во соопштението на ХЕРА.

Скандалот со групата „Јавна соба“ излезе во јавноста викендов, кога професорка од гимназијата „Орце Николов“ алармираше дека на таа група во која има околу 7.400 членови се споделуваат експлицитни содржина, со фотографии и видеа на голи малолетни девојки, но и повозрасни. Откако групата беше откриена во јавноста таа беше преименувана, но и се намали бројот на членови. Во јавноста излегоа информации дека во групата членувале и бизнисмени, политичари, новинари но имињата не беа откриени, бидејќи истите како имиња може да бидат додадени без нивна согласност или занење. Според последните информации, МВР го пронајде администраторот на групата кој е тинејџер и побара од „Телеграм“ да ја отстрани оваа група.