Апелациониот суд Скопје на Здравко Савески и Владимир Куновски им изрече условна затворска казна од 6 месеци и казна од половина милион денари за материјалната штета за демолирањето на канцеларијата на поранешниот претседател Ѓорѓе Иванов, за време на „Шарената револуција“ пред речиси 6 години.
Оваа пресуда следи по две ослободителни пресуди кои предходно ги укина Апелација.
По изречената пресуда Хелсиншкиот комитет за човекови права објави реакција во која изразува незадоволство и разочарување од пресудата на Апелациониот суд Скопје.
„Се работи за настан од 12 април 2016 година, кога тогашниот претседател Ѓорѓе Иванов објави општа аболиција на 56 лица, со која најмногу беа опфатени политичари од тогашната власт засегнати од истрагите на СЈО и неколкумина политичари од тогашната опозиција“, наведоа од Хелсиншки.
Потсетуваат дека оваа одлука на претседателот беше дочекана со жестока реакција од граѓаните, кои истиот ден спонтано го изразија својот револт, собирајќи се пред неговата канцеларија во центарот на градот.
„Репресивниот полициски апарат на тогашната власт веднаш ја покажа својата жестокост, но и селективност во справувањето со демонстрантите. Од целата толпа – шест лица беа приведени и ставени во куќен притвор, а обвинителството брзо спреми обвинителни акти за водење судски кривичен прогон“, се вели во соопштението од Хелсиншки комитет.
„Од една страна, казнувањето и справувањето со високиот криминал на функционерите оди бавно, доведувајќи до застареност на кривичното гонење за дела кои вклучуваат милионски суми проневерени буџетски средства, политичка репресија или незаконито следење на граѓаните. Од друга страна, за граѓани што се одважија и се спротиставија на криминалната аболиција, судските постапки траат шест години и се изрекуваат драконски казни за нивниот активизам“ истакнаа од Хелсиншки.
Од комитетот за човекови права велат дека со оваа пресуда судовите фактички испраќаат порака до граѓаните да останат безгласни и пасивни пред корупцијата, криминалот и неправдата, затоа што во спротивно ќе се соочат со кривичен прогон во кој повисоката цел – демократијата и владеењето на правото, треба да отстапи пред политичката репресија и формализмот на правната држава.
„Сметаме дека е поразително тоа што судовите целосно го игнорираат контекстот во кој се случило делото, односно дека ги занемаруваат причините за граѓанскиот револт во критичниот ден – срамната аболиција која беше кулминација на режимското владеење, заробувањето на институциите и погазувањето на правната држава. Правото мора да ѝ служи на правдата“ заклучија од Хелсиншки.
