Потребно е дополнително време, но политичките партии треба да демонстрираат демократска зрелост, изјави денеска еврокомесарот Јоханес Хан на свеченото примопредавање на 31 теренско возило, донација од ЕУ за Граничната полиција, а во контекст на вчерашните разговори со лидерите на политичките партии околу прашањето за формирање нова влада.
– Партиите треба да продолжат да преговараат и да демонстрираат демократска зрелост, треба да понудат одлична програма базирана на Договорот од Пржино и посветеност на европската перспектива. И ако ова биде случај, јас сум убеден во иднината на земјата – изјави Хан.
На прашањето дали во разговорите со него, партиите вчера покажале демократска зрелост, Хан не одговори, но рече дека тој е секогаш оптимист.
Еврокомесарот во обраќањето на свеченоста, се осврна и на средбата што утрово ја имаше со претседателот Ѓорге Иванов.
Тој рече дека претседателот го замолил „Европската Унија да направи повеќе за неговата земја и да има повеќе настани како што е денешниот, посветен на донацијата на возилата од ЕУ“.
– Јас го поканив Иванов да дојде со мене на настанот што ја демонстрира силната соработка и силните врски меѓу ЕУ и вашата земја – рече Хан.
Претседателот Иванов, сепак, не беше меѓу присутните гости на денешната свеченост во кругот на МВР.
