Еврокомесарот Јоханес Хан по Советот на министри на ЕУ на кој беше одреден условен датум за почеток на преговори со Македонија порача дека оваа одлука значи дека Европската Комисија од утре може да го започне процесот на скрининг.
– Им честитам на граѓаните на идната Северна Македонија за денешните успеси, бидејќи сега е јасно дека ќе ги започнеме преговорите во јуни идната година и како Комисија веднаш можеме да почнеме да ги подготвуваме преговорите почнувајќи утре. Ова е сега јасна задача, јасна перспектива и е јасна награда за постигнувањата од последните неколку недели – вели Хан.
Македонија по напорна битка помеѓу 25 земји членки против Холандија, Франција и Данска доби зелено светло за датум за старт на преговори во јуни, под неколку услови.
Европската Комисија ќе треба да произведе извештај фокусиран на три главни теми: реформа на јавната администрација, реформа на разузнавачките служби, како и судските реформи и борбата против корупцијата. Врз основа на овие услови Македонија ќе може да ја одржи меѓувладината конференција до крајот на 2019.
