Гувернерката на Народната банка, Анита Ангеловска-Бежоска, заедно со нејзиниот тим се сретна со италијанскиот амбасадор Паоли Палминтери и високите претставници од Одделот за борба против фалсификување пари на корпусот на Карабинерите, генерал – командант Џанлука Витаглиано и поручник Пиер Луиџи Фери, соопшти НБРСМ. Целта на средбата, како што велат од таму, е размена на искуства и истражни техники против фалсификување пари.
Било истакнато дека НБРСМ постојано ги јакне своите капацитети во овој домен следејќи ги европските стандарди и дека меѓународната соработка е од исклучително значење за справувањето со овие појави.
Притоа, амбасадорот ѝ честитал на Народната банка за пристапувањето кон СЕПА (Единствената област за плаќање во евра).
На работниот состанок присуствувале и претставници на Министерството за внатрешни работи од Одделот за финансиски криминал и тимот на Дирекцијата за трезорско работење во Народната банка. Тие ја презентирале правната регулатива, институционалната поставеност и начинот на функционирање на системот за борба против фалсификувањето пари, како и за заштитните елементи на денарите.
Средбата била дел од проектот „Перикле IV“ (2021 − 2027), програма насочена кон финансирање размена на персонал, семинари, обуки и студии за органите за спроведување на законот и судските органи, банките и другите институции вклучени во борбата против фалсификувањето на еврото. Активностите се одвиваат во еврозоната, во земјите на ЕУ надвор од еврозоната и во трети земји.
