Нов пат и канализација за Другово, санација на водоводот во Вранешница, проект за ангажирање дефектолози, изградба на нов автопат Гостивар – Кичево беа дел од проектите што им ги вети претседателот на ВМРО-ДПМНЕ, Никола Груевски, на жителите на Кичево.
При посетата на Вранешница, Груевски на граѓаните им ги објасни можностите што ги нуди новата штотуку отворена фабрика на „Ки сејфти систем“, која треба да стигне до 1.000 вработувања.
Жителите на Другово побараа санација на патот и фекална канализациска мрежа. Министерот за транспорт и врски, Владо Мисајловски, им рече дека Владата и Министерството ќе стават на располагање 740.000 евра за Кичево и за Другово, а дека потребно е само да се аплицира од страна на Општината.
Груевски посочи дека покрај тоа што активно веќе се гради автопатот Кичево – Охрид, за што се инвестираат 375 милиони евра, се работи и на реализација на проект за изградба на автопатот Гостивар – Кичево.
– Тоа е крупен, деликатен проект бидејќи е тежок и скап пат, затоа што е планински. Работиме во моментот на две основи: една е ако се оди во ЕБРД, втора ако се оди со јавно-приватно партнерство затоа што сега се јавија нови компании кои покажаа интерес. Во разговорите со нив, со претставниците на Владата, понудија многу подобри услови отколку тоа што беше во минатото. Така што се трга во двете насоки, која ќе биде поповолна со таа ќе се оди. Во секој случај, тој проект ќе се направи, ќе се гради – рече Груевски.
