Премиерот Никола Груевски, придружуван од министрите за надворешни работи и за здравство, Никола Попоски и Никола Тодоров, пристигна во резиденцијата на Европската унија на средба со еврокомесарот за проширување и за соседска политика, Јоханес Хан, и со европратеничката тројка, Едвард Кукан, Иво Вајгл и Ричард Ховит.
Претходно во резиденцијата на ЕУ средба со Хан имаше и лидерот на СДСМ, Зоран Заев, кој дојде во придружба на Радмила Шекеринска и на Рената Тренеска-Дескоска.
Хан утринава имаше средба со лидерите на албанските политички партии, Али Ахмети на ДУИ и Мендух Тачи на ДПА.
По средбата со Хан, Ахмети изјави дека постои готовност за решавање на политичката криза и оти време е во преден план да се стават државните, а не партиските интереси.
По средбата со Груевски, во зависност од текот на разговорите, можно е да се одржи лидерска средба. Во текот на денот е најавена и прес-конференција на Хан, на која ќе бидат соопштени постигнатите резултати од разговорите и дали на повидок е решавање на политичката криза.
Денешните преговори се обид да се излезе од ќор-сокакот, откако власта и опозицијата не успеаја да ги испеглаат разликите за договорот од 2 јуни, со кој се предвидуваат измени на изборниот законик, прочистување на избирачките списоци, враќање на опозицијата во Собранието, запирање на објавувањето „бомби“ и формирање транзициска влада, која во април следната година ќе ги спроведе изборите.
