Добро е што со здружени напори, на граѓаните што секојдневно 70-80 дена протестираа, на ВМРО-ДПМНЕ и на нашата пратеничка група и на претседателот на државата успеавме да дојдеме до ситуација кога Зоран Заев беше принуден, ставен во ќош да потпише еден таков документ, како што никој досега што барал мандат од претседателот, ниту имало потреба, ниту се помислувало да има потреба да го потпише, изјави денеска лидерот на опозициската ВМРО-ДПМНЕ, Никола Груевски, коментирајќи го добивањето на мандат на Зоран Заев за формирање влада.

Груевски рече дека ВМРО-ДПМНЕ ќе остане со отворени очи и „доколку Заев измрда од патот“ за кој има потпишано гаранции, тие „ќе реагираат жестоко“.

– Треба да останеме со отворени очи и доколку измрда, тргне кон друг пат, различен од тој за кој вчера даде гаранции и ветувања, ВМРО-ДПМНЕ ќе реагира жестоко во склад на демократските можности и ќе се спротивстави, а верувам дека и сите други ќе го направат тоа – изјави Груевски.

Лидерот на ВМРО-ДПМНЕ нагласи дека партијата има план и дека имаат подготвени чекори за понатаму.

-ВМРО-ДПМНЕ и понатаму ќе остане будна. Ние имаме план, ние знаеме што правиме, имаме подготвени чекори и во правец на зачувување на унитарноста и во следење на овој проект генерално. Ќе продолжиме со енергични чекори, ќе продолжиме со динамиката на нашите планови, кои етапно ќе ги објавуваме – додаде Груевски.