Опозицијата да не се надева дека на власт ќе дојде преку ДУИ и Али Ахмети, туку да се врати во парламентот, рече денеска пратеникот од ДУИ, Артан Груби, на седницата на Комисијата за мандатно-имунитетни прашања, на која се донесе предлог-одлука за одземање на мандатите на опозициските пратеници кои ја бојкотираат работата на Собранието.
– Од 2002 година до денес, и едната и другата партија се обидуваа да дојдат на власт преку ДУИ. За жалење е тој напор бидејќи на власт се доаѓа со добра понуда. Мандатот на пратеникот е силен, зад него стојат 7.000 до 10.000 гласачи. Пратениците на СДСМ, со тоа што ја бојкотираат работата на Собранието, не ја уважуваат волјата на овие гласачите за што ќе бидат казнети на следните избори, кога и да се случат – рече Груби.
Тој уште еднаш ги повика пратениците на опозицијата да се вратат во Собранието.
На говорот на Груби, со соопштение реагираа од СДСМ.
– Навистина е штета за пратеникот од ДУИ, Артан Груби, што заврши конкурсот за директор на Центарот за комуникации на ВМРО-ДПМНЕ. Во согласност со ставовите и со замислувањата што ги презентира Груби во јавноста, тој би бил одличен потенцијал за оваа позиција во ВМРО-ДПМНЕ – пишува во соопштението на опозицијата.
