Новиот закон за медиуми на грчката влада не помина на Уставен суд. Со 14 гласа „за“ и со 11 „против“, судот одлучи дека законот е неуставен бидејќи владата го заобиколила Националниот совет за радиодифузија во аукцијата во која се доделија само четири национални телевизиски концесии.

Аукцијата за национални концесии ја спроведе Генералниот секретаријат за медиуми, а не Советот за радиодифузија, кој според Уставниот суд е единствениот надлежен орган за регулација на работата на медиумите. Со одлуката на судот, целата аукција се смета за неважечка, а новата потенцијална процедура за доделување концесии за работа ќе мора да ја спроведе Советот за радиодифузија. Грчката влада, пак, ќе треба да ги врати парите што телевизиите ги платија за концесиите.

По судската одлука, работите ќе си останат по старо. Сите постојни телевизии, независно од тоа дали обезбедиле концесија, продолжуваат најнормално со работа. Бизнисмените Иван Савидис и Вангелис Маринакис, кои обезбедија концесија за работа, но немаат постоечки телевизии, со судската одлука губат секаква дозвола за емитување телевизиска програма.

Грчката влада остро го нападна Уставниот суд за одлуката, ставајќи го под знак прашалник неговиот кредибилитет со обвинување дека во минатото ги одобрил меморандумите за штедење и одлуката да се затвори грчката државна телевизија. Владиниот потпарол Олга Геровасили истакна дека со оваа одлука судот лишува 15.000 деца од ранливи групи од одење во градинки, спречува вработување на 4.000 нови медицински лица во државните болници и ја осиромашува државната каса за 250 милиони евра што ѝ се потребни на државата, за да им ги врати парите на богати бизнисмени.

Сепак, судската одлука не става крај на владините планови за регулација на медиумскиот простор. Геровасили најави дека од понделник пред парламентот ќе донесат нов закон за концесии, со кој секоја телевизија ќе мора да плати за концесија за користење на фреквенциите за работа.

„Одлуката на Уставниот суд ја враќа државата во претходниот неуставен систем. Ние нема да дозволиме тоа да се случи. Ништо нема да ја спречи волјата на владата да воведе ред, според принципи и правила на праведност, во нерегулираниот медиумски простор“, истакна Геровасили.

Опозициските партии ја коментираат судската одлука како пораз за грчката влада. ПАСОК и партијата Река бараат оставка од министерот Никос Папас, кој е одговорен за овој закон за медиуми, а Нова демократија бара владата да си даде оставка и да распише предвремени избори.