Во казината во Гевгелија бројот на клиенти од Грција опаѓа од 2011 година, па наваму, но тоа е поизразено во овој период.
– Грците се перманентно во криза, но од 2011 година наваму нивниот број во казината сè повеќе се намалува. Тоа е поизразено сега поради економската неизвесноста и затворањето на банките. Трендот на опаѓање на посетите продолжува – изјави за „Мета“, Александар Алексов од казиното „Аполонија“.
Тој објаснува дека не само во казината, туку дека сè помалиот број гости се одразува и врз прометот на другите стопански субјекти.
Грците сè поретко може да сретнат и на зелениот пазар во Битола и по бутиците за облека и за чевли.
Со стравувања дека преку граница не можат да изнесат зеленчук, овошје и храна од Македонија, битолските дуќанџии велат дека прометот им е паднат на половина. Според нив, грчката криза удира и по нашата економија во пограничниот регион.
– Од Грците го вадевме ќарот, ама сега ги нема, не трошат ниту евро. Ако поминат на пазар, ги молам да земат грав и ориз, ама не купуваат, велат дека на граница им ги фрлаат најлоните со храна. Затоа велам дека нивната криза е и наша криза – вели продавачка на зелениот пазар во Битола.