Како што беше најавено, актуелниот градоначалник на Штип Благој Бочварски се најде во денешната предложена листа за состав на новата влада на мандатарот Зоран Заев, како предлог за нов министер за транспорт и врски. Пред денешното предлагање, во изминатите денови се случија повеќе промени во Советот на Општина Штип, како подготовка за заминувањето на Бочварски во централната власт.

Извесно е дека негова замена на чело на Општината ќе биде довчерашниот претседател на Советот на општина Штип, средношколскиот професор Јане Миланов. На седницата во понеделникот, Миланов си поднесе оставка од местото претседател, бидејќи според Законот за локална самоуправа, в.д. градоначалник може да биде само член на советот, но не и претседателот на Советот.

Миланов треба да биде избран за в.д. градоначалник на Штип, откако ќе биде констатирана неспоивост на функциите на градоначалникот Бочварски. Советот нема да се надополни со нов член, бидејќи формално, Миланов ќе биде само вршител на должноста. Сепак, тоа нема да го промени распоредот на силите во Советот. Имено, од штипскиот Совет во пратеници заминаа двајца членови – по еден од СДСМ и од ВМРО-ДПМНЕ. Меѓутоа, се случи парадоксална ситуација. Советникот од листата на коалицијата на ВМРО-ДПМНЕ е од партија, која во меѓувреме, влезе во коалиција со СДСМ, па така новиот советник, всушност ќе го зајакне мнозинството на владејачката партија.

На овонеделната седница, Маријана Рогожарска – Поповска е избрана за нова претседателка на Советот на Општината Штип, избор што не беше поддржан од опозицијата, која ја напушти седницата.

Благој Бочварски ќе биде првиот министер од Штип во македонска влада по Јордан Мијалков. Штип имаше заменици министри, но во последните влади немаше ниту еден министер.

Овие парламентарни избори донесоа дури пет нови пратеници од Штип, по двајца од СДСМ и ВМРО ДПМНЕ и еден од Левица. Во претходниот состав градот го претставуваа само двајца пратеници и двајцата од редовите на ВМРО ДПМНЕ. Благој Бочварски од пратеник на СДСМ, на локалните избори во 2017 година, стана градоначалник и на негово место дојде пратеничка од Виница.