Инспектори од Државниот инспекторат за градежништо и урбанизам преку вонредна контрола направиле увид во изгрaдба на објект во општина Охрид, објект кој се наоѓа во заштитетната зона на Старото градско јадро во Охрид, поточно во Старата охридска чаршија, информираат во Министерството за транспорт.
„При увидот, констатирано е прекршување на одредбите од Законот за градење, односно инвеститорот вршел градежни активности без Одобрение за градење за конкретниот објект. Во рамки на своите законски надлежности Државниот инспекторат за градежништво и урбанизам донесе решение број ИП 1бр 74-137 од вонреден инспекциски надзор со кое се стопира изградбата и го затвора објектот за понатамошни градежни активности“, наведено е во соопштението од министерството.
Како што се додава, против инвеститорот ќе се поднесат соодветни пријави согласно законските прописи. Оттаму најавија дека засилени контроли на Инспекторатот за градежништво и урбанизам ќе продолжат и во следниот период на територијата на целата држава.
„Заштитата на Старото градско јадро на Охрид е со цел со цел да се спречат дејства, појави и влијанија со кои може да настане оштетување, неповратно изменување, уништување или деградирање на споменичната целина. Старото градско јадро на Охрид е составен дел од доброто заштитено како „Охридско природно и културно-историско подрачје од 1978 година, како и од „Природно и културно наследство на Охридскиот Регион“, впишано на Листата на светско наследство на УНЕСКО во 1980 година“, се додава во соопштението.
