Град Скопје со 5.000 евра награда за олимпискиот вицешампион во теквондо Дејан Георгиевски

Фото: Град Скопје

На иницијатива на градоначалникот Петре Шилегов, Град Скопје ќе му додели парична награда во износ од 300.000 денари (нешто помалку од 5.000 евра) на добитникот на сребрениот медал во теквондо (категорија над 80 килограми) на Олимписките игри во Токио, Дејан Георгиевски. Оваа одлука ќе се најде на дневниот ред на следната седница на Советот на Град Скопје.

„Георгиевски предмалку слета на аеродромот во Скопје каде што беше пречекан од голем број граѓани, а свечениот пречек ќе се одржи во 19:30 часот на плоштадот Македонија. Дејан Георгиевски по историскиот настап на Олимписките игри, каде што го освои сребрениот медал, стана најуспешниот македонски спортист на Олимписките игри, а ова е прв медал за нашава држава по пауза од 21 година,“ се вели во соопштението на Град Скопје.

Владата исто така донесе одлука да го награди Георгиевски со 1,2 милиони денари поради освоениот сребрен медал на Олимписките игри во Токио.