Заменик-претседателката на СДСМ, Радмила Шекеринска, е разочарана што во Белата куќа не влезе жена претседател, додека Влатко Ѓорчев од ВМРО-ДПМНЕ очекува продлабочување на односите меѓу САД и Македонија, по завршувањето на изборите во двете земји.
Ова се оцeнките на Шекеринска и на Ѓорчев по изборот на Доналд Трамп за нов претседател на САД. Шекеринска, Ѓорчев и Артан Груби, шеф на кабинет на лидерот на ДУИ, Али Ахмети, беа дел од гостите во хотелот „Алаксендар палас“ каде Амбасадата на САД во земјава организираше следење во живо од пребројувањето на гласовите од изборите за претседател на САД.
– Не можам да кажам дека како жена не сум разочарана што во Белата куќа не влезе жена претседател, но тоа е одраз на демократската волја на граѓаните, како што ќе биде на 11 декември во Македонија. Резултатите покажаа дека и покрај големата медиумска поддршка и покрај сите предвидувања, волјата на граѓаните не може да се заобиколи – рече Шекеринска, додавајќи дека се надева на промени и кај нас.
Ѓорчев, пак, заклучи дека Македонија и САД се и ќе останат партнери и сојузници.
– Интересно е да се набљудуваат американските избори. Заклучокот е дека Македонија и САД се партнери, имаме комуникација, сојузници сме, така што по завршувањето на изборите во Америка, како и по завршувањето на изборите во Македонија на 11 декември, ќе пристапиме кон одржување и продлабочување на соработката во САД – изјави Ѓорчев.
