Третото издание на настанот „Денови на Холандија“, беше отворено со симболична портокалова велосипедска тура организирана од Амбасадата на Кралството Холандија, „Гоу грин – Биди зелен“ и „Ист гејт мол“. Годинашниот настан е посветен на 750 годишнината од основањето на Амстердам како и одбележувањето на националниот ден на Холандија – Денот на Кралот (27 април).
„Од 25 до 27 април, посетителите на Ист гејт мол ќе имаат можност да ја доживеат атмосферата на автентичен холандски пазар и уметничка колонија, како и да учествуваат во игра на потрага. Ќе има и изложба на велосипеди декорирани од средношколци од Скопје и сликање во живо во организација на „Лазар Личеноски“ и Академијата за уметности „Фонтис“, информираат од амбасадата на Холандија во земјава.
Оттаму додаваат дека во партнерство со повеќе холандски и македонски компании, уметници и организации, донеле холандски вкусови и бои во Скопје.
„Сакаме заедно со вас да ги одбележиме убавите нешта кои нѐ поврзуваат, како што се уметноста, културата, добрата храна, цвеќето и секако – велосипедите“, рече амбасадорката Узлем Џанел на отворањето.
Холандскиот пазар ќе биде отворен овој викенд (26 – 27 април) од 12 до 18 часот, а изложбите и играта на потрага ќе бидат достапни во текот на работното време на „Ист гејт“, од 10 до 22 часот.
