Амбасадорот на ЕУ во Скопје, Дејвид Гир денеска реагираше дека земјава не може да го користи системот „европско знаменце“ при донесувањето на закони во Собранието, во случаи кога се усвојуваат законски решенија што не се во согласност со регулативата на ЕУ.
Гир рече дека системот „европско знаменце“ при усвојувањето на закони во Собранието е дизајниран да се користи кога треба да се усвои некој закон за усогласување на земјата со европските стандарди. Земјава, како и сите други земји кои го минале патот на пристапување кон ЕУ, морале да усвојат илјадници законски решенија за усогласување со ЕУ, а ова би окупирало голем дел од времето на пратениците ако овие закони се носат низ нормална процедура, па дури би биле потребни и децении. Затоа е дизајниран системот „европско знаменце“, објасни евроамбасадорот Гир.
„Она што не можете да го правите е да го користите европското знаменце кога имате закони што не се во согласност со европската регулатива или бидејќи имате процедури или проблеми во Собранието“, изјави евроамбасадорот Гир.
Тој додаде дека загриженоста на ЕУ е кај законите што се однесуваат на проектите што ќе ги гради „Бехтел-Енка“, а во насока на користењето на „европското знаменце“ кое е несоодветно ако нема усогласување со европската регулатива.
Гир појасни дека ако се следат извештаите на Европската комисија за напредокот во евроинтеграциите, тогаш може да се согледа дека ЕУ секоја година ги повторува коментарите дека користењето „европско знаменце“ при донесувањето на закони не треба да се користи за да се скрати процесот на консултации за законот, кога всушност нема усогласување со регулативата на ЕУ.
Инаку, владата минатиот петок на седница ги усвои петте предлог-закони за измени на Законот за работни односи, за експропријација, за урбанистичко планирање, за градење и за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп– Битола). Овие предложени законски решенија беа испратени со „европско знаменце“ до Собранието на РСМ.
