Германската полиција уапси најмалку осум исламисти со германско државјанство за време на полициската акција во Северна Рајна Вестфалија. Рацијата е спроведена поради сомневање дека лицата со кражби во цркви и во училишта собирале средства за поддршка на џихадисти во Сирија.
Како што јавуваат германските медиуми, 240 полицајци учествувале во акцијата во центарот на Келн. Претресени се домовите на 20 осомничени лица, а полицијата кај дел од уапсените пронашла фалсификувани пасоши.
Германија најави дека ќе ги заостри кривичните мерки против лицата што ќе им се приклучат на терористичките организации или ќе ги финансираат ваквите организации.
