Генералниот секретар на Социјал-демократскиот сојуз и носител на листа во третата изборна единица, Љупчо Николовски прогласи победа на коалицијата „Можеме“ на денешните предвремени парламентарни избори.
„На 75 отсто обработени податоци од денешиот кристално чист и европски изборен ден, јасно е – победуваме и продолжуваме уште подобро“, рече пред малку на прес-конференција Николовски.
– Победивме чисто, победивме европски. Граѓаните го казнија ВМРО-ДПМНЕ, затоа што сакаше да донесе опасност. Денеска се потврди поддршката на храбрите одуки што ги носеше Зоран Заев и коалицијата. ВМРО-ДПМНЕ во скапата бела палата ќе треба да си бара ново раководство. Коалицијата „Можеме“, во растечки тренд води со два мандати – рече тој.
Николовски информира дека коалицијата води во Битола со над 3.000 гласови, во Центар со над 4.100 гласови, во Крива Паланка над 2.500 гласови.
– Победивме и во Крушево, во Дебар, Долнени, Берово и во други општини каде што граѓаните ја упатија поддршката за нас – додаде тој.
Потсети дека во 2016 година, партијата ја врати слободата и критиката, нешта што, како што рече, пред тоа никој немал храброст да ги донесе.
– Имавме деструктивна кампања. Оваа држава беше заробена една цела деценија. Денес сме земја со концепт, модел за тоа како се решаваат проблемите – рече Николовски.