„По хаосот во кој се најдоа на влезот во Унгарија, бегалците од Блискиот Исток доживуваат нови трауми, сега на влезот во Хрватска. Уште едно тесно грло на границата покажува дека таа земја е неспособна да излезе на крај со најголемиот бран на масовна миграција во изминатите 70 години“, пишува денеска „Гардијан“.
Лондонскиот весник потсетува дека во средата хрватскиот премиер, Зоран Милановиќ, оптимистично изјавил дека Хрватска е подготвена да ги прими и насочи тие луѓе.
Но, во четвртокот владата на оваа држава констатирала дека кризата ја надминува способноста на која било земја да се избори сама со овој проблем.
Како што пишува „Гардијан“, бегалците на границата со Хрватска имаат уште една причина за грижа, неексплодирани нагазни мини, кои ги има на околу 500 квадратни километри површина на хрватската територија, останати по војната во 90-тите години на минатиот век.