Амбасадорката на Обединетото Кралство во земјава, Рејчел Галовеј, по повод 2-годишнината од влезот на Северна Македонија во НАТО, потсети на досегашната соработка на двете земји.
„Од пристапувањето на Северна Македонија во НАТО пред две години, Обединетото Кралство тесно соработуваше со Армијата на Република Северна Македонија во поддршка на реализацијата на целите на способности поставени од НАТО. Нашата работа подразбираше редовно распоредување на краткорочни тимови за обука за советување во однос на тактиката на пешадијата и развој на лидерството“, потсети британската амбасадорка.
Како што посочи таа, советник назначен од Обединетото Кралство (ОК) е интегриран во Министерството за одбрана и е ангажиран за советување во однос на процесите и интероперабилноста на НАТО. Исто така, формирана е ќелија за координација на обуката во Скопје за да се усогласиме и оптимизира британската поддршка на обуката.
Галовеј потсети и на техничката и логистичка поддршка што ОК ја давало и уверува дека ќе продолжи да ја дава, посебно во поглед на обуките и користењето на воениот полигон „Криволак“.
„Обезбедивме донации и најсовремени системи за преноќување и во наредните месеци ќе испорачаме нови електронски мети и привремена зграда за урбана и хибридна обука на полигонот Криволак. Тесно соработуваме со Министерството за одбрана, Армијата на Република Северна Македонија и нашите НАТО сојузници на подготовките за вежбата Брз одговор 22 [Swift Response 22], која вклучува повеќе од 4.000 членови од седум НАТО сојузници, вклучувајќи ги Северна Македонија, Обединетото Кралство, САД, Италија, Франција, Црна Гора и Албанија, а е една од најголемите воени вежби што ќе се реализираат оваа пролет на полигонот Криволак.
