Најновиот извештај „Држави во транзиција“ на „Фридом Хаус“ за 2020 година покажува дека Македонија напреднала во критериумите „изборен процес“ и „независни медиуми“. Овогодинешната оценка за нашата земја е 3,75 и ова е трета година по ред да се подобрува демократскиот напредок. Македонија и Косово се единствените две земји од Балканот во кои е констатиран напредок на демократијата во 2020 година. Најлоша оценка од 3,57 во извештајот „Држави во транзиција“ од „Хридом Хаус“ добивме во 2017 година.
Во извештајот на „Фридом Хаус“ е евидентиран напредок во медиумскиот сектор, чија што независност годинава е оценета со 3,5. Сепак, ваквата оценка не е поволна, бидејќи пониско рангирани од неа се единствено справувањето со корупцијата и судската независност во Македонија. Во 2020 година највисока оценка од 4,75 има добиено граѓанското општество во земјава.
И покрај констатираниот напредок, Македонија останува во групата на земји со транзициски хибридни режими, во која како европски земји се вклучени Албанија, Србија, Косово, Црна Гора, Босна и Херцеговина, Унгарија, Молдавија и Украина.
Категоријата на држави со транзициски хибридни режими значи дека во Македонија се кревки демократските институции и постојат значителни предизвици кои се однесуваат на политичките права и граѓанските слободи.
Еден од авторите на овогодинешниот извештај на „Фридом Хаус“, Мајкл Шмелцер, во изјава за „Гласот на Америка“ вели дека напредок во областа на медиумите на Балканот е постигнат кај Македонија и Косово.
– Двете земји бележат напредок во областа на независните медиуми. Нашите стручњаци утврдија долгорочен тренд на пораст на објективното и веродостојно известување, како и зголемување на бројот на различни медиуми – посочи Шмелцер.
Текстот е изработен во рамки на проектот „Опсерваторија на медиумските реформи“, што го спроведува Фондацијата за интернет и општество „Метаморфозис“, со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.
