Францускиот амбасадор Кристијан Тимоние утре ќе ја посети компанијата „Завар“, при што ќе се сретне со косопственичката на оваа компанија, Марта Наумовска-Грнарова, како и со претставнички на македонската мрежа на ментори, млади жени претприемачи, креатори на проекти со кои се присуттни на регионално, европско и на глобално ниво.

Посетата е во рамките на активностите на амбасадата по повод 8 Март – Меѓународниот ден на жената.

– Амбасадата на Република Франција повеќе години наназад ја промовира еднаквоста помеѓу жените и мажите во општествениот и во политичкиот живот. Борбата против сите форми на дискриминација врз жените е од суштинско значење за хармоничен развој на општеството во целина. Стереотипите ја попречуваат целосната еднаквост меѓу жените и мажите. Затоа, на Меѓународниот ден на правата на жените, кој се празнува на 8 Mарт, ќе се потсетиме дека е потребно секојдневно да се грижиме за една вистинска рамноправност, толку потребна во ова наше време – се вели во соопштението на амбасадата.