Саудска Арабија објави дека 34, главно муслимански нации, се здружиле во нова воена алијанса за борба против тероризмот, јавуваат светските медиуми.
Како што пренесува „Би-Би-Си“, повикувајќи се на извештаите на државните медиуми во Саудска Арабија, заедничкиот оперативен центар на коалицијата ќе биде во главниот град на земјата, Ријад.
Во воената алијанса учестуваат земји од Азија, Африка и од арапскиот свет, но не и главниот регионален ривал на Саудска Арабија, Иран.
Одлуката за формирање на колацијата, според британскиот национален сервис, доаѓа по меѓународниот притисок врз заливските арапски земји од кои било побарано да направат повеќе во борбата против Исламска држава.
Саудискиот министер за одбрана, Мохамед бин Салман, изјавил дека новата воена алијанса ќе ги координира своите акции против терористите во Ирак, Сирија, Либија, Египет и во Авганистан.
Сепак, Авганистан, Сирија и Ирак не се дел од коалицијата.
„Во моментот, секоја муслиманска земја се бори против тероризмот индивидуално, поради што координираните акции се многу важни“, изјавил Мохамед бин Салман.
Според информациите, цел на воената коалиција нема да биде само Исламска држава.
