Ние ќе ги заштитиме нашите интереси секогаш кога е потребно, изјави претседателката на Европската комисија Урсула Фон дер Лајен, одговарајќи на заканите за царини на американскиот претседател Доналд Трамп, пренесува „Гардијан“. Според неа, односите со САД се „темелник“ на мирот, но вели дека има граници.
Фон дер Лајен зборуваше на конференцијата на амбасадорите на ЕУ. Нарекувајќи ја врската меѓу ЕУ и САД „камен-темелник на мирот и просперитетот“ и нагласувајќи дека „ниту една друга економија во светот не е толку интегрирана, на толку напреден начин“, сочинувајќи речиси 30 отсто од глобалната трговија, таа рече дека нејзиниот фокус е на тоа да работите успеат, да функционираат.
„Нашиот прв приоритет сега е да работиме на многу области каде што нашите интереси се спојуваат. И сè уште има простор да се направи многу повеќе. Ќе бидеме подготвени за тешки преговори каде што е потребно и да најдеме решенија каде што е можно за да ги решиме сите незадоволства и да ги поставиме основите за посилно партнерство“, истакна таа.