Рецензираме објава на социјалната мрежа Фејсбук во која се споделува информација од соопштение на Управата за финансиска полиција за кривична пријава, којашто оваа управа ја поднела до Јавното обвинителство во Штип за измама со стари акумулатори. Објавата е од 28 март 2025 година, меѓутоа самото соопштение за поднесената кривична пријава до Јавното обвинителство е од 29 април 2024 година, речиси една година порано.
Текстот што се чита во прилогот пак, е преземен од медиумски напис на телевизија „Телма“ објавен овде, исто така објавен на 29 април 2024 година, кога навистина било издадено соопштението од Управата за финансиска полиција за конкретниот настан.
„Вистиномер“ го пронајде оригиналното соопштение кое е прикачено во форма на документ на следниот линк, а е објавено на страницата на Управата за финансиска полиција. Кога ќе се пристапи до документот од оригиналното соопштение на сајтот на Финансиска полиција, иако тоа не е прецизно датирано, сепак на соопштението стои годината која е 2024.
Во прилогот од објавата што ја рецензираме, пак, што е објавен на 28 март 2025 година, без да се наведе дека информацијата е речиси една година стара, се чита текстот:
Финансиската полиција објави дека во штипското обвинителството поднела кривична пријава за измама и фалсификување со што е направена штета на фирма за откуп на стари акумулатори во вредност од околу 3 и пол милиони евра. Осомничени се три лица и една фирма. Парите завршувале на сметка на отпад за стари акумулатори со лажни потврди за откуп на стока. Еден вработен во отпад и директорот на отпадот на акумулатори заедно со третиот соучесник, којшто е вработен во оштетената компанија правеле лажни фактури за наводно купување на акумулаторите иако во реалноста немало купување и преземање на стоката. Оштетената фирма ги плаќала фактурите со што, според финансиската полиција била измамена за 214 милиони денари односно за приближно 3 и пол милиони евра.
А овој текст е преземен од сајтот на „Телма“, каде што објавен речиси една година порано и презентиран како да е нова информација.
Поради сите горенаведени факти објавата што ја рецензираме ја оценуваме како објава во која се пропушта контекстот. Финансиската полиција поднела кривична пријава против фирма и три физички лица, ама во 2024 година и информацијата е стара. Меѓутоа, во објавата што ја рецензираме таа е презентирана како да е нова информација без да се наведе од кога е, што ја прави објава во која се пропушта контекстот.
