Фото: Арбнора Мехмети, Мета.мк

Имаме нови кластери и за жал, морам да констатирам дека имаме непочитување на мерките. И покрај забраната, луѓето прават масовни собири, а тоа е нешто што апсолутно нема логика. Имаме граѓани кои се собираат, иако е тоа забрането. Не може да се прави свадба, кога е тоа забрането, не може други собири да се прават ако е забрането да се прават, истакна на прес-конференција министерот за здравство Венко Филипче. Тој рече дека лично смета оти не е потребно продолжување на вонредната состојба.

– Откако се направи пристап со тестирање и изолација на сите контакти, состојбата во Штип и во тетовско постепено се смирува. Останува Чаир како општина во која има најмногу пациенти кои се заразени. Во Охрид имало прослава, како и семејна прослава во Скопје, каде што има позитивни случаи. Епидемиолозите имаат проблем со давање вистинити податоци. На терен се случуваат прекршувања на мерката за самоизолација и на мерките за групирање. Контролите се засилени, ги спроведуваат на терен овие активности. Има уредба со која е предвидено оној кој ќе прекрши решение за самоизолација или дава лажни информации, ќе му се одреди мерката државен карантин во траење од 14 дена, а трошокот ќе биде на нивна сметка – рече Филипче.

Тој информира дека овој бран сè уште трае, иако некои жаришта постепено се смируваат.

– Препораките на комисијата остануваат исти и барам да се почитуваат од сите граѓани. Пред нас е долга битка со вирусот и ќе мора да научиме да живееме со него. Имаме неколку случаи во кои заради давање неточни податоци, повеќе здравствени работници се во изолација. Апелирам сите да кажуваат точни податоци. Институциите мора да се почитуваат и сите препораки да се имплементираат. Не смее да продолжи праксата кога родилки не кажуваат точни информации, тоа не смее да се случува, а секое такво однесување повлекува голема одговорност – додаде тој.

Досега во државата се направени вкупно 40.004 тестирања од почетокот на епидемијата.