Фестивалот „Скопје синема сити“ во четири дена ќе понуди избор на музички филмови

Фото: Kyle Head on Unsplash

Во дворот на Кинотека на Северна Македонија утре со почеток во 19 часот ќе започне седмото издание на Филмскиот фестивал за музички документарни филмови „Скопје синема сити“.

Фестивалот ќе трае 4 дена, 18-19 септември и 21-22 септември, и ќе се одвива во дворот на Кинотека на Македонија. Сите проекции ќе почнуваат во 19 часот и картите ќе можат да се набават пред проекциите на касата од Кинотека.

Филмот што ќе го отвори Фестивалот е уметничкиот филм „Кога ќе се родиме“ во режија на Винсент Мун, за филмскиот композитор Олафур Арналдс, којшто е воедно и „Артист во фокусот“. Истата вечер ќе се прикаже филмот за џез великанот Мајлс Дејвис „Birth of the Cool“ со што ќе се одбележи 30-годишнината од неговата смрт.

Втората вечер ќе биде прикажан филмот „The Hip“ на режисерот Јане Алтипармаков, а влезот за проекцијата ќе биде слободен. Филмот што ќе следи е „B-Movie: Lust and Sound in West Berlin“ за боемската и декадентна сцена во Западен Берлин.

На 21 и 22 септември, ќе биде прикажан краткиот филм „Angel’s Breath“ односно филм за музичката авантура на Милан Младеновиќ и Суба во Бразил кој го изнедри истоимениот албум. Во продолжение ќе биде прикажан филмот за Кирил Џајковски „Современа музика за современа доба“ во продукција на ТВ Војводина. Филмот е портрет на Џајковски и неговите достигнувања во електронската и филмската музика, а осврт е даден и на неговото минато со бендовите Бастион и Леб и сол. Филмот досега не бил прикажан во Македонија.

Ќе бидат прикажани и филмовите „Трагачи по звукот“ (бесплатна проекција) и „Primal Scream: Изгубените снимки од Мемфис“. Последната вечер ќе бидат прикажани филмовите “Кејт Буш: Трчајќи по ридот’ и “Марк Болан: Космичкиот танчер’.

Фестивалот е во организација на здружението „Номад-Арт Скопје“ во соработка со Кинотека на Македонија, Гете Институтот и фондацијата „Милан Младеновиќ“.