Македонската влада претстојнава пролет планира да го отвори прашањето за увоз на работна сила од странски земји поради недостигот на лица од земјава кои се подготвени да работат. Вицепремиерот за економски прашања Фатмир Битиќи денеска на годишната конференција „Економски предизвици во 2023 година: како да го одржиме економскиот раст и ја трансформираме економијата“ рече дека не постои некој од стопанствениците кој не се соочил со проблемот на недостаток на работна сила.
„Моја заложба е на пролет оваа година да ја отвориме целосно дискусијата како и Оперативниот план за вработување за квотата за странци во нашата земја. Сметам дека е време да го отвориме нашиот пазар на труд, со цел, зголемување на конкурентноста а знаеме дека за зголемување на конкурентноста клучен е човечкиот фактор“, заклучи Битиќи.
Тој додаде дека краткорочна цел кон која треба да гледаме, а која ќе даде долгорочни ефекти, е покачување на продуктивноста на вработените и соодносот на платите, но и конечно да зборуваме за отворање на нашиот пазар на труд.
Вицепремиерот Битиќи изјави дека прв приоритет за земјава периодов е намалување и одржување на стапката на инфлација, без притоа економијата да влезе во рецесија. Како втор приоритет, тој ја наведе енергетската стабилност и диверзификација, без притоа да се заборави на социјалниот аспект и праведната енергетска транзиција, се наведува во соопштението испратено од владината прес-служба.
