Фармацевтскиот гигант „Фајзер“ денеска соопшти дека експерименталната пилула против ковид-19 што ја развива ги намалува за 90 отсто стапките на хоспитализација и смрт кај возрасните со висок ризик, јави АП.
Во моментот голем број истражувачи низ светот се обидуваат да создадат пилула против ковид-19 што би можела да се пие како и други лекови, дома, и така да се ублажи притисокот врз лекарите и болниците.
Моментно сите третмани на пациенти заболени од ковид-19 што се користат во САД се даваат преку инфузија или преку инјекција.
Пилулата на „Мерк“, конкурент на „Фајзер“ веќе е во фаза на оценување од Администрацијата за храна и лекови на САД (ФДА), откако покажа многу силни почетни резултати, а вчера и Обединетото Кралство ја одобри.
Од „Фајзер“ сметаат дека ФДА и меѓународните регулатори ќе ја одобрат за употреба нивната пилула во најкраток можен рок, откако независни експерти препорачале дека повеќе не е потребно компанијата да ја продолжува својата студија, поради убедливите резултати. Откако „Фајзер“ ќе поднесе барање за одобрување, ФДА би требало да донесе одлука за неколку седмици или месеци.
Ако биде одобрена, пилулата за лекување на ковид-19 од „Фајзер“ би се нудела под марката „Паксловид“ (Paxlovid).
Во компаниската студија со 775 испитаници, оние што ја пиеле пилулата на „Фајзер“ заедно со друга антивирусна терапија бргу по појавата на симптоми на ковид-19, забележале повлекување до 89 отсто на стапките на хоспитализација на еден месец од земањето на терапијата во однос на оние што пиеле плацебо.
Испитаниците во студијата биле невакцинирани, со умерени до средно тешки симптоми на ковид-19, а биле во група што би завршила в болница поради хронични проблеми како прекумерна тежина, дијабетес или кардиоиваскуларни болести.
Терапијата се давала три до пет дена од почетокот на симптомите, и траела пет дена.
За конечни сознанија, сепак ќе треба да се почека на одлуката на регулаторот во САД – ФДА, како и на другите регулатори на лекови и медицински срества.
